तणनाशकांच्या किंमती मध्ये वाढ...

शेतकरी खरीप हंगामाच्या तयारी ला लागले असून मॉन्सूनचे आगमन राज्यात झाल्याची आनंद वार्ता मिळाली आहे. या पार्श्वभूमीवर पुरेसा पाऊस पडल्यानंतर शेतकरी पेरण्यांच्या तयारीत आहेत. यंदा भारतीय हवामान विभागाने चांगला पाऊस पडण्याचा अंदाज व्यक्त केल्याने शेतकऱ्यांमध्ये उत्साह आहे. त्यामुळे पीककर्जापासून तर बियाणे, खते आणि औषधे खरेदीपर्यंतच्या तयारीला शेतकरी वेग देत आहेत.
एकीकडे शेतकऱ्यांमध्ये उत्साह असला तर यंदा अनेक कृषी निविष्ठांचे दर वाढले आहेत. त्यामुळे शेतकऱ्यांचा पेरणीचा खर्चही वाढणार असल्याने शेतकऱ्यांमध्ये नाराजी जाणवत आहे. बियाणे, खतांप्रमाणेच किटकनाशके आणि तणनाशके या निविष्ठा महत्त्वाच्या आणि आवश्यक मानल्या जातात. मजूर टंचाईमुळे अलीकडच्या काळात शेतकरी तणनाशकांना पसंती देत आहेत. मात्र यंदा तणनाशकांच्या किमती वाढल्या आहेत.

तणनाशकांचे आधीचे आणि आताचे दर (प्रतिलिटर)
ग्लायसिल - ३५०/४५०
परसूट - ११००/१३५०
सरगा सुपर - १३५०/१४००
साकेत - ८००/८५०

कसे होणार पिकांचे रक्षण?
शेतशिवारांमध्ये तण अधिक प्रमाणात वाढल्यास त्याचा थेट परिणाम पिकांच्या वाढीवर होतो. यामुळे सरासरी उत्पादनात मोठ्या प्रमाणात घट येते. त्यामुळे तणाचा वेळीच नाश करणे अत्यावश्यक असते. असे असताना खत, बियाणे, शेतीउपयोगी औजारांचे दर वाढण्यासह तणनाशकाचे दरही वाढविण्यात आल्याने पिकांचे रक्षण नेमके कसे करायचे, असा प्रश्न शेतकरी उपस्थित करीत आहेत.

तुरीच्या बियाण्यांचे दरही वधारले
खरीप हंगामात सोयाबीन, कपाशी, मूग, उडीद यासोबतच तुरीची विक्रमी क्षेत्रावर लागवड केली जात आहे. यंदा तुरीच्या बियाण्यांचे दर चांगलेच वधारले असून शेतकऱ्यांना जाणवणाऱ्या आर्थिक अडचणीत अधिकच भर पडली आहे. वाढत्या महागाईमुळे शेतकऱ्यांचे खरीप हंगामातील आर्थिक बजेट विस्कळीत झाल्याचे बोलले जात आहे.

प्रतिबंधात्मक उपाय म्हणजे शेतात तणांची कमीत कमी उगवण होईल याकडे लक्ष देणे;म्हणजेच पुढील प्रसारास आळा कसा बसेल याची खबरदारी घेणे होय.
1) पेरणीसाठी वापरावयाचे बियाणे तणविरहित असावे.
2) पाण्याचे पाट, शेतातील बांध किंवा धुरे, कंपोस्टचे खड्डे इत्यादीं जवळ तणे उगवू देऊ नयेत व उगवल्यास फुलोऱ्यावर येण्यापूर्वी उपटून टाकावेत.
3) पूर्ण कुजलेलेच शेणखत किंवा कंपोस्ट वापरावे.
4) पीक पेरणीपूर्वी उगवलेली तणे वखराने काढून टाकावीत.
5) सतत स्वच्छता करावी.
6) शक्‍य असल्यास आंतरपीक पद्धतीचा अवलंब करावा.