मराठवाड्यातील शेतकऱ्यांसाठी महत्त्वाचा कृषी सल्ला…

परभणी वसंतराव नाईक मराठवाडा कृषी विद्यापीठाने शेतकऱ्यांसाठी आठवड्याचा कृषी सल्ला जाहीर केला आहे. प्रादेशिक हवामान केंद्र, मुंबईच्या अंदाजानुसार, मराठवाड्यात पुढील पाच दिवस आकाश स्वच्छ आणि हवामान कोरडे राहण्याची शक्यता आहे.

हवामान अंदाज

तापमान स्थिती:

• पुढील तीन दिवसांत कमाल तापमान 1-2 अंशांनी घटणार असून नंतर वाढण्याची शक्यता.
• किमान तापमानातही हळूहळू घट होऊन नंतर 1-2 अंशांनी वाढ होईल.

पाऊस व तापमान:

• 22 ते 28 नोव्हेंबर दरम्यान पाऊस सरासरीपेक्षा कमी.
• कमाल तापमान सरासरीपेक्षा कमी आणि किमान तापमान सरासरीएवढे किंवा कमी राहण्याची शक्यता.

बाष्पोत्सर्जन:

• सॅक आणि इसरो, अहमदाबादच्या उपग्रह अहवालानुसार बाष्पोत्सर्जनाचा वेग वाढलेला आहे.

शेतकऱ्यांसाठी सल्ला

पाणी व्यवस्थापन:
पिके, फळबागा, भाजीपाला आणि फुल पिकांना हवामान कोरडे असल्यामुळे आवश्यकतेनुसार पाणी द्या.

पीक व्यवस्थापन

कापूस पीक:

• तयार झालेल्या कापसाची वेचणी करून तो उन्हात वाळवून साठवावा.
• गुणवत्तेच्या टिकावासाठी वाळलेल्या कापसाची योग्य साठवणूक करावी.

तुर पीक:

• शेंगा पोखरणाऱ्या अळीसाठी 5% निंबोळी अर्क किंवा क्विनॉलफॉस (20 मि.ली./10 लि. पाणी) वापरून फवारणी करा.
• हलके पाणी देऊन फुलोरा आणि शेंगा धरण्याच्या अवस्थेतील पिकाचे रक्षण करा.

रब्बी ज्वारी:

• पेरणीनंतर 15-20 दिवसांनी पहिली कोळपणी करा.
• लष्करी अळीच्या नियंत्रणासाठी इमामेक्टीन बेन्झोएट (4 ग्रॅम/10 लि. पाणी) किंवा स्पिनेटोरम (4 मि.ली./10 लि. पाणी) वापरा.

बागायती गहू:

• उशीरा पेरणी 15 डिसेंबरपर्यंत करा.
• पेरणीसाठी 125-150 किलो बियाणे प्रति हेक्टरी वापरा.
• पेरणीसाठी शिफारस केलेली खते द्या आणि 25-30 दिवसांनी अर्धे नत्र द्यावे.

रब्बी मका:

• पेरणी नोव्हेंबरमध्ये 60x30 सेंमी अंतरावर करा.
• पेरणीपूर्वी बीजप्रक्रिया करून प्रति हेक्टरी 15 किलो बियाणे वापरा.

भाजीपाला व्यवस्थापन

• रब्बी हंगामातील भाजीपाला पिकांमध्ये खुरपणी करून तणमुक्त ठेवा.
• आवश्यकतेनुसार पाटाने पाणी द्या.

फुलशेती व्यवस्थापन

• गुलाब: कळी उमलण्याच्या अवस्थेत काढणी करा.
• झेंडू व आष्टूर: पूर्ण उमलल्यावर काढणी करा.
• पिकांमध्ये खुरपणी करून तणमुक्त ठेवा आणि आवश्यकतेनुसार पाणी द्या.

पशुधन व्यवस्थापन

• बदलत्या हवामानात पशुधनाचे रक्षण करा.
• थंडीपासून संरक्षणासाठी गोठ्यात काड, पेंढा किंवा मॅट वापरा.
• खिडक्या-दारांवर गोण्यांचे पडदे लावून थंड वाऱ्याचा प्रतिबंध करा.
• दुधाळ जनावरांना दिवसा सूर्यप्रकाशात ठेवा.