दिवाळीपूर्वी नुकसानग्रस्त शेतकऱ्यांच्या खात्यात पैसे जमा होणार : अजित पवार

राज्यातील पावसामुळे पीकांचे मोठ्या प्रमाणात नुकसान झाले आहे. या पार्श्वभूमीवर नुकसानग्रस्त शेतकऱ्यांना दिवाळीपूर्वीच आर्थिक मदत दिली जाणार असल्याचे आश्वासन उपमुख्यमंत्री आणि अर्थमंत्री अजित पवार यांनी ठाण्यात पत्रकार परिषदेत दिले. त्यांनी स्पष्ट केले की, शेतकऱ्यांच्या बँक खात्यात थेट मदत जमा केली जाईल.

शेतकऱ्यांसाठी दिलासा

पवार म्हणाले, “शेतकरी संकटात सापडला आहे. सरकारची जबाबदारी आहे की दिवाळीपूर्वी त्याला मदत मिळावी. त्यामुळे लवकरच नुकसानग्रस्त शेतकऱ्यांच्या खात्यात पैसे जमा करण्याची प्रक्रिया सुरू केली जाईल.”

मुरबाड माळशेज रेल्वेमार्गावर पाठपुरावा

यावेळी अजित पवार यांनी मुरबाड माळशेज रेल्वेमार्गाचा मुद्दा देखील उपस्थित केला. गेल्या अनेक वर्षांपासून हा प्रकल्प रखडला आहे. यावर तोडगा काढण्यासाठी पक्षाचे उपाध्यक्ष प्रमोद हिंदूराव यांना सोबत घेऊन रेल्वेमंत्र्यांकडे दिल्लीमध्ये पाठपुरावा करणार असल्याची ग्वाही त्यांनी दिली.

स्वराज्य संस्थांच्या निवडणुका

चार वर्षांपासून स्थानिक स्वराज्य संस्थांच्या निवडणुका झालेल्या नाहीत. त्यामुळे अनेक कार्यकर्त्यांचे प्रतिनिधित्व थांबले आहे. पवार म्हणाले, “सर्वोच्च न्यायालयाने स्पष्ट निर्देश दिले आहेत की ३१ जानेवारी २०२६ पूर्वी जिल्हा परिषद, नगरपालिका आणि महानगरपालिका निवडणुका घ्याव्या लागतील.”

तसेच, ५ ऑक्टोबर रोजी केंद्रीय गृहमंत्री अमित शहा महाराष्ट्र दौऱ्यावर येत असून, मुख्यमंत्री आणि दोन्ही उपमुख्यमंत्री त्यांना भेटून शेतकऱ्यांसाठी मदतीबाबत चर्चा करणार आहेत.

मुरबाडमध्ये जनसंपर्क कार्यालयाचे उद्घाटन

दसऱ्याच्या मुहूर्तावर उपाध्यक्ष प्रमोद हिंदूराव यांच्या हस्ते अजित पवार यांनी मुरबाड येथे जनसंपर्क कार्यालयाचे उद्घाटन केले. त्यानंतर माउली गार्डन येथे कार्यकर्ता मेळावा आयोजित करण्यात आला.

यावेळी प्रतीक हिंदूराव यांनी मुरबाडमधील बंद पडलेल्या कारखान्यामुळे तरुणांपुढे निर्माण झालेली बेरोजगारीची समस्या मांडली. तसेच, परिसरात मेडिकल कॉलेज, इंजिनिअरिंग कॉलेज आणि नाट्यगृह उभारण्याची मागणी केली.

कार्यकर्त्यांना सल्ला

अजित पवार यांनी कार्यकर्त्यांना उद्देशून सांगितले, “ठेकेदारीतून कामे करा, परंतु त्याचा फायदा सर्वसामान्य जनतेला झाला पाहिजे. स्वतःच्या फायद्यासाठी ठेकेदारी करू नका.”

उपस्थित मान्यवर

यावेळी पक्षाचे मुख्य प्रवक्ते आनंद परांजपे, आमदार दौलत दरोडा, जगन्नाथ शिंदे, भरत गोंधळी, चंद्रकांत बोस्टे यांच्यासह अनेक मान्यवर उपस्थित होते.