भूमी अभिलेख पोर्टल राहणार बंद…

भूमी अभिलेख विभागाचे ऑनलाइन पोर्टल तांत्रिकदृष्ट्या अपडेट करण्यात येणार आहेत. त्यामुळे १९ ते २२ जुलै दरम्यान विभागाची सर्व पोर्टल बंद राहणार अशी बातमी समोर आली आहे. 

त्यामुळे तीन दिवसांच्या काळात सातबारा उतारा, मिळकत पत्रिका, फेरफार उतारे ऑनलाइन डाऊनलोड करता येणार नाहीत, अशी बातमी ई-फेरफार प्रकल्पाच्या राज्य समन्वयक सरिता नरके यांनी दिली.

ई-फेरफार, ई-हक्क, ई-चावडी तसेच ई-महाभूमी या पोर्टलवरून सातबारा उतारे, आठ अ, मिळकत पत्रिका, फेरफार उतारे, इत्यादि ऑनलाइन डाऊनलोड करता येतात. या पोर्टलचे सॉफ्टवेअर जुने झाल्याने सध्या वेगाची मर्यादा येत आहे. उतारे डाऊनलोड करताना अनेक अडचणी देखील येत आहेत.

हे सॉफ्टवेअर २०१६ पासून वापरात आहे. त्यात आधुनिकता आणणे अतिशय गरजेचे होते. त्यामुळेच भूमी अभिलेखाने हे सॉफ्टवेअर अपडेट करण्याचे ठरवले आहे. त्यासाठी विभागा मार्फत चालवण्यात येणारे सर्व पोर्टल १९ जुलैच्या सायंकाळी ६ वाजेपासून २२ जुलैच्या रात्री १२ पर्यंत बंद राहतील.

कमी वेळात उतारे होणार डाऊनलोडन :

नवीन सॉफ्टवेअर हे २०२४ मध्येच तयार करण्यात आले आहे. त्याची चाचणी यशस्वी झाली असून, त्याचा वापर सुरू झाल्यानंतर उतारे कमी वेळेत डाऊनलोड करणे सोपे होईल, अशी माहितीही नरके यांनी दिली. 

सध्या ई-पीक पाहणी, खरीप पीक विमा योजना तसेच अन्य योजनांसाठी शेतकरी अर्ज करत आहेत. त्यामुळे अर्ज भरण्यासाठी लागणारी आवश्यक कागदपत्रे त्यांनी १९ जुलैपूर्वीच काढावीत, जेणेकरून अर्ज करताना अडचण भासणार नाही, असे निवेदन नरके यांनी केले.