Namo shetkari : नमो शेतकरी योजनेचा लाभार्थ्यांसाठी आनंदाची माहिती! 

कधी येणार पहिला हप्ता? कृषीमंत्र्यांनी दिली माहिती

Namo shetkari : मोदीसरकारनंतर आता राज्यातील महायुतीसरकारही शेतकऱ्यांच्या खात्यावर पैसे जमा करणार आहे. या साठी सरकाराने 'नमो शेतकरी महा सन्माननिधी' योजना जाहीर केली होती. या योजनेतील पैसे शेतकऱ्यांना कधी मिळणार याबाबत कृषीमंत्री धनंजय मुंडे यांनी माहिती दिली आहे.

प्रधानमंत्री किसान योजनेच्या धर्तीवर राज्य शासनाने जाहीर केलेल्या 'नमो शेतकरी महा सन्माननिधी' योजनेतील पहिला हप्ता पात्र शेतकऱ्यांना लवकरच मिळावा यासाठी सुरू असलेल्या कार्यवाहीचा आढावा कृषिमंत्री धनंजय मुंडे यांनी मंगळवारी घेतला. हा पहिला हप्ता लवकरच वितरित करण्यात येईल, अशी माहिती यावेळी मुंडे यांनी दिली.

Namo shetkari yojana :मंत्रालयात झालेल्या आढावा बैठकीत कृषी आयुक्त सुनील चव्हाण, कृषी संचालक दिलीप झेंडे, महाआयटीच्या व्यवस्थापकीय संचालक जयश्री भोज, महाआयटीचे विभागप्रमुख किरण गारग, अमेय सरवणकर, सहसचिव सरिता बांदेकर-देशमुख, श्रेणिक शहा, उपसचिव संतोष कराड, अवर सचिव नीना शिंदे, उपआयुक्त दयानंद जाधव तसेच कृषी व माहिती तंत्रज्ञान या दोन्ही विभागाशी संबंधित अधिकारी उपस्थित होते.

पावसाळी अधिवेशन २०२३-२४ मधील पूरक मागण्यांमध्ये नमो शेतकरी महासन्मान निधी योजनेसाठी ४ हजार कोटी रुपयांचा निधी मंजूर करण्यात आलेला आहे. त्यामधून योजनेचा पहिला व दुसरा हप्ता वितरित केला जाऊ शकतो. राज्यात पावसाने ओढ दिल्यामुळे शेतकरी आर्थिक अडचणीत आला आहे. त्यामुळे त्याला तात्काळ नमो शेतकरी महासन्मान निधी योजनेचा पहिला हप्ता मिळणे गरजेचे आहे, असे मुंडे म्हणाले. निधीचे वितरण पीएफएमएस प्रणालीतून थेट शेतकऱ्यांच्या खात्यामध्ये केले जाणार असल्याने त्यामध्ये योजनेची नोंदणी करण्यात आलेली आहे. पीएम किसान योजनेप्रमाणे नमो शेतकरी महासन्मान निधी योजनेचे मॉड्युल महाडीबीटी पोर्टलवर विकसित करण्याचे काम महाआयटीकडून सुरू आहे, असेही त्यांनी सांगितले.

source : agrowon